प्रश्न_१- चमत्कार करणारे बहुसंख्य बुवा हे भोंदू असतात हे खरे. पण काही दैवी पुरुषांना तरी चमत्कार करण्याचे सामर्थ्य प्राप्त असते, हे खरे नाही काय?

#प्रश्न_१- चमत्कार करणारे बहुसंख्य बुवा हे भोंदू असतात हे खरे. पण काही दैवी पुरुषांना तरी चमत्कार करण्याचे सामर्थ्य प्राप्त असते, हे खरे नाही काय?
उत्तर- चमत्कार करणारे बुवा, बाबा आणि तथाकथित दैवी पुरुष यांपैकी कोणालाही चमत्कार करण्याचे सामर्थ्य नसते. जे अशा चमत्काराचा दावा करतात ते केवळ हातचलाखी अगर विज्ञान यांच्या आधारेच चमत्कार करतात. दैवी शक्तीने नव्हे.
जगप्रसिद्ध बुद्धिप्रामाण्यवादी वैज्ञानिक डॉ. अब्राहम कोवूर यांनी चमत्काराचा दावा करणाऱ्या जगभरच्या ज्योतिषी, हस्तसामुद्रिक, मांत्रिक, देवऋषी, दैवी शक्ती प्राप्त असलेले तथाकथित स्त्री-पुरुष या सर्वांना १९६३ साली चमत्कार सिद्ध करण्याचे आव्हान दिले होते. या आव्हानाला जगभरच्या वृत्तपत्रांतून प्रसिद्धी दिली होती. उभयपक्षी मान्य अशा व्यासपीठावर डॉ. कोवूर व त्यांचे सहकारी यांच्यासमोर चमत्कार सिद्ध करावा व हातचलाखी आहे की नाही हे तपासण्याचा अधिकार डॉ. कोवूरांना असावा अशी त्यांची अट होती. या अटी मान्य करून जो चमत्कार सिद्ध करेल, त्यास एक लाख रुपयांचे बक्षीस दिले जाईल असे कोवूरांनी जाहीर केले होते.
कोवूरांच्या मृत्यूपर्यंत हे आव्हान स्वीकारण्यास कोणीही पुढे आला नाही. यास अपवाद बंगलोरमधील एका डॉक्टरचा. डॉ. जी. व्यंकटराव याने प्रथम आव्हान स्वीकारण्याचे नाटक केले. पण चाचणीच्या अटी ऐकताच त्याने माघार घेतली व १००० रु. अनामत रक्कम गमावली.
आपण सिद्ध पुरुष आहोत असा दावा करणारे विलासबाबा, तरडगाव (जि.सातारा) व गोडबाबा (बारामती) हे हातचलाखीच करत होते. अंधश्रद्धा निर्मूलन समितीने अशी कितीतरी प्रकरणे संपूर्ण महाराष्ट्रात उघडकीस आणली आहेत. अंधश्रद्धा निर्मूलन समिती महाराष्ट्र, आजही दैवी सामर्थ्याने चमत्कार करणाऱ्या स्त्री-पुरुषांची चाचणी घेण्यास एकवीस लाख रुपयांच्या आव्हान रकमेसह तयार आहे. अनुभवांती अं.नि.स.ची खात्री झाली आहे, की तथाकथित दैवी पुरुष हे हातचलाखी अगर विज्ञान वापरूनच चमत्कार करतात. चमत्कार हा बनवाबनवीचाच मामला असतो.
-डॉ. नरेंद्र दाभोलकर व
प्रा. प. रा. आर्डे
यांनी लिहिलेल्या 'अंधश्रद्धा: प्रश्नचिन्ह आणि पूर्णविराम' या पुस्तकातून साभार